Se aur la terza Rassegna de Teater de Fascia con na bela neva: chest’outa la rassegna scomenzarà ai 30 de november del 2024 a Sen Jan e la se serarà su ai 4 de mèrz del 2025 ta Penia.
Sarà n temp feruscol, curious e pien de spas, chel che i comedianc de Fascia vel ge sporjer a sia jent, endèna la rassegna de teater 2024/25 endrezèda dal Comun General de Fascia!
Endèna la rassegna a ogne un che vegnarà a teater ge vegnarà dat fora na tessera sun chela che vegnarà metù su l stempel de ogne spetacol. Chi che jirà a veder amancol 4 spetacoi ciaparà n picol don fascian n muie douc!
Scomenza via la rassegna de teater l grop de la Mizacoles da Ciampedel co la comedia da grignèr N lomescel da desgatièr de Antonia Dalpiaz: en sabeda 30 de november da mesa les nef da sera te oratorie de Poza, en domenia al 1 de dezember da les cater domesdì te teater/chino de Cianacei e amò en mèrtesc ai 3 de dezember da mesa les nef da sera te la Gran Ciasa a Soraga.
Chest an la rassegna de teater la ge vegn dedichèda a Vigilio Iori rechia, om che à fat n muie per l teater ladin.