Aisciuda Ladina 2020

N’Aisciuda Ladina fora de anter per chest 2020.

L’emergenza sanitèra Covid-19 la ne oblighea duc a stèr te cèsa da dotrei setemènes en ca. Aboncont l temp l passa, e no l se cruzia de dut chel che l é do che sozet: la dates emportantes e i dis i passa, e sion beleche a mez de l’aisciuda. Per nos ladins l é ruà ence chest an la dì storica che zelebrea l’identità, la cultura e l lengaz che ne caraterisea: l’Aisciuda ladina – festival del lengaz.

https://youtube.com/watch?v=cO3MkB_qc1c

La regoles sanitères no ne empedesc de la zelebrèr te la setemèna che tol ite i 5 de mé. L faron a na vida desferenta per chesta 12° edizion. Ve porton dant chest sit internet dedicà a l’Aisciuda, che vegn a esser l lech virtuèl sun chel che podon se scontrèr.

L 2020 l é n an emportant per i ladins e per l’Aisciuda, ajache zelebron l centené de la bandiera ladina, tachèda fora per la pruma outa sul Jouf de Frea ai 5 de mé del 1920.

Chest cedean l é l argoment de chest an, che l vegn tratà tras desvaliva scomenzadives che les vegnarà publichèdes dì per dì, a scomenzèr dai 4 de mé. Co la colaborazion de la Union di Ladins de Fascia e de la Union generèla di Ladins de la Dolomites metaron a jir aprofondimenc storics en cont de chest argoment e sun chest sit vedaron ence l’autra scomenzadives che vegnarà metù a jir via per l 2020.

L’Aisciuda ladina l’é semper stat na festa voluda e de gran emportanza ence per i bec, che i speta con gran gaissa che rue Bertol – mascotte de l event, ma ence gran cognoscidor de l’identità e e del lengaz ladin – che da l an passà l rua con sie pecont e colaborador Bertolin. Purampò nience ic no podarà jir fora per la scoles, ma i sarà sun chest sit con sorpreises enteressantes e che paa la speisa no se perder.

Sul sit l é stat binà ensema ence i contegnui e i materièi de duta la edizions passèdes de la manifestazion, con chela de poder fèr n viac virtuèl per cognoscer i desvalives argomenc e i protagonisć che te chisc egn à tout pèrt a l’Aisciuda ladina.

Spetan de se scontrèr endodanef per poder tegnir su l lengaz ladin te la vita de duc i dis e per stravardèr tras la sacontanta ocajions culturèles l’identità de chest popul, ve speton duc i dis sun chesta direzion te la setemèna dai 4 ai 9 de mé.